Qëllimi i këtij mjeti është të lehtësojë raportimin e dyshimit të arsyeshëm ose njohurisë se është kryer, kryhet ose me gjasë do të kryhet vepër e dënueshme, joetike ose vepër tjetër e paligjshme ose e palejueshme në sektorin publik dhe privat, me të cilën dëmtohet ose rrezikohet interesi publik për mbrojtjen e mjedisit jetësor, si dhe përmirësimi i transparencës së raportimeve të parashtruara, gjegjësisht i monitorimit të tyre.

Me këtë rast, Florozon nuk është subjekt që është përgjegjës për raportim sipas Ligjit për Mbrojtjen e Sinjalizuesve dhe paraqitet si ndërmjetës në institucionet kompetente sipas ligjit, përkatësisht në Ministrinë e Punëve të Brendshme, Komisionin Shtetëror për Parandalimin e Korrupsionit, Avokatin e Popullit dhe Prokurorinë Publike.

Me raportimin e parashtruar përmes kësaj platforme, ju nuk fitoni statusin e sinjalizuesit, por mund të zgjidhni shkallën e konfidencialitetit duke i ndjekur dispozitat përkatëse dhe me atë rast mund të zgjidhni nëse dëshironi ta dorëzoni raportin plotësisht në mënyrë anonime, të lini detajet e kontaktit për të komunikuar me Florozonin, por ta ruani anonimitetin përpara autoriteteve kompetente, ose ta zbuloni identitetin tuaj.

Të dhënat tuaja personale nuk do të publikohen, ndërsa informatat e përfshira në raport nuk do të përdoren në mënyrë që do ta dëmtonin raportuesin.

Vëmë në dukje se në rastet e fillimit të procedurës para organeve kompetente në bazë të raportimit të parashtruar përmes këtij mjeti, raportimi i rremë dhe incizimi i paautorizuar mund të ndiqen penalisht në bazë të Kodit Penal (nenit 366 dhe nenit 152).